Ég held að það sé kominn nýr arftaki misheppnaðasta manns Íslands sem hérna áður fyrr var Kristinn Björnsson skíðakappi sem yfirleitt datt í hverju einasta móti sem hann tók þátt í. Hinn nýji “herra misheppnaður” er enginn annar en Benedikt LaFleur sem er gjörsamlega með kúkinn upp á bak varðandi sjósundið sitt. Eins og flestir vita þá synti maður að nafni Benedikt yfir Ermasundið nú fyrir skemmstu. Það var samt ekki sami Benedikt og hefur reynt áður. Sem sagt sitt hvor Benediktinn. Benedikt LaFleur reyndi að synda í kringum Reykjavík 2006 sem undirbúning fyrir Ermasundið en tókst ekki. Síðan reyndi hann við Ermasundið 2006, 2007 og 2008 og alltaf mistókst honum. Hann hefur einnig tvisvar sinnum reynt við Drangey en viti menn, mistókst. Tók saman nokkrar fyrirsagnir á þeim ágæta vef visir.is sem lýsir þessu nokkuð vel.

• Hætti sjósundi í myrkri og lélegu skyggni (13.ágúst 2006)
• Lagði árar í bát (13.ágúst 2006)
• Þurfti að hætta við sund yfir Ermasundið (7.september 2006)
• Gæti þurft að hætta við sundið (8.júlí 2007)
• Náði ekki að synda yfir Ermasundið (9.júlí 2007)
• Benedikt hálfnaður með Drangeyjarsundið (5.september 2007)
• Benedikt hættur Drangeyjarsundi vegna erfiðra aðstæðna (5.september 2007)
• Hættir við Ermasundið – aftur (25.júní 2008)
• Benedikt LaFleur reynir við Ermasund í þriðja sinn (25.júní 2008)
• Lafleur gafst upp (30.júní 2008)
• Ellilífeyrisþegi yfir Ermarsund en Benedikt ekki (1.júlí 2008)
• Benedikt hætti við Drangeyjarsund vegna kulda (31.júlí 2008)

Þetta verður seint talinn frábær árangur hjá kappanum. Spurning að byrja á því að reyna að taka kannski 5 ferðir fram og til baka í Árbæjarlauginni áður en hann tapar meira?

Skellti mér 18.holur hérna á Grafarholtsvelli í morgun. Áttum pantaðan tíma, ég og Óðinn, klukkan 9:30. Það var frekar mikill lúxus á okkur þar sem Óðinn var búinn að panta golfbíl þegar ég mætti á svæðið. Þannig að við brunuðum um svæðið eins og óð kind upp og niður hæðir. Spiluðum með þeim Erling og Heiðdísi sem voru afar hress. Mismunandi hvað maður lendir með góðu fólki. Það sem helst stóð upp úr voru tveir fuglar sem ég náði á 4.holu og 16.holu. Setti niður svona 7-10m pútt þar ofaní. Svo var líka ansi eftirminnilegt þegar ég skaut í stein og boltinn flaug svona 10cm frá því heilagasta. Það hefði líklegast eitthvað dottið af mér ef boltinn hefði lent þar sem hann átti ekki að lenda. Fékk 33 punkta á þessum hring fyrir þá sem skilja punkta.

Þetta var í fyrsta skiptið sem ég spilaði Grafarholtið og líkaði afar vel við. Nú er bara að sækja um og bíða í 3 ár eftir inngöngu sem virðist vera málið. Nema að maður nái að redda sér með einhverju megamixi. Þannig að ef það er einhver að lesa þetta sem á Grafarholtsvöllinn þá má hinn sami hringja í mig og við finnum út úr þessu.

Nú kemur það fyrir að í sjónvarpsþáttum er eitthvað um að vera sem þarfnast að sé ljósmyndað. Þá eru fengnir greinilega einhverjir aukaleikarar til að leika ljósmyndara. Hefur alltaf pirrað mig rosalega mikið hvernig þessir aukaleikarar kunna ekki að leika. Eru svo langt frá því að líta út fyrir að vera alvöru ljósmyndarar að það er alveg skelfilegt. Er að horfa á The Wire og þar átti einn aukaleikarinn ansi gott múv. Hún hélt um linsuna með hægri hönd og þóttist vera að taka myndir með vinstri. En eins og flestir vita þá snúa myndavélar akkúrat öfugt. Takkinn til að taka mynd er hægra megin á vélinni. Held að þetta sé það fyndnasta sem ég hef séð í aukaljósmyndaraleik. Hún ætti auðvitað skilið að fá Emmy fyrir þetta.

Á laugardaginn var Auður í vaktafríi. Var sem sagt að vinna föstudag og laugardag. Vöknuðum svona um 13 og tókum okkur til. Keyptum okkur að borða, bættum smurolíu á bílinn og lögðum svo í hann. Komum við á Eyrarbakka hjá Sigurgrjóni og versluðum eina mynd af honum. Svo lá leiðin yfir á Selfoss í átt að Flúðum og enduðum í Syðra Langholti. Þar var brúðkaupsveisla hjá Jóa frænda mínum og Beggu konunni hans. Þau voru búin að gifta sig formlega í Danmörku þannig að þetta var í rauninni bara brúðkaupsgleði. Þegar við mættum var nýbúið að forða hlöðunni frá bruna. Kom smá glóð frá grillinu sem var að elda svína- og lambaskrokk og það kom víst temmilegt bál. Bóndinn sem var að leigja pleisið var ekkert of sáttur með þennan bruna en algjörlega honum að kenna að bjóða upp á grillaðstöðu og vera með gommu af þurru heyi við hliðina á pappahlöðunni. Þetta var fínasta veisla og maturinn afar hress. Fórum ekkert mjög seint í bæinn þar sem Auður þurfti að mæta á vakt daginn eftir. Búin að vera á vakt annan hvern dag í næstum heilan mánuð. Það er temmileg geðveiki.

Hérna er smá video þegar þau mættu formlega í brúðkaupið sitt. Komu hjólandi með dósir í eftirdragi. Svo er bara að horfa á videoið. Var ansi hresst hjá þeim. Gaman að fara í brúðkaup sem ekki allir eru uppstrílaðir í einhver fansípansíföt. Þarna var fólk bara í gúmmítúttum og lopapeysum. Svo er ég að vinna í því að setja fleiri video frá brúðkaupinu á youtube. Meðal annars video frá “Perrabandinu” sem gerði góða hluti eins og þeir eru vanir.

Þessar “0kr á netið með 3G” auglýsingar hafa verið nú í þó nokkurn tíma hjá Símanum. Auglýst í útvarpi og sjónvarpi og ég veit ekki hvar og hvar. Eins og þetta hljómar fyrir almúgann eins og mig þá ætti maður að geta farið á netið með 3G án þess að borga krónu. 0kr þýðir einmitt engar krónur eða ókeypis. En nei svo er ekki… þetta er nefnilega bara ókeypis innanlandsnotkun og að því kemst maður þegar farið er á vefsíðu símans. Þar á undirsíðu stendur “Á kvöldin og um helgar kemstu á netið innanlands fyrir 0 krónur í 3G símanum þínum eða með netlykli í tölvuna.” Finnst að þessi klausa “innanlands” ætti að koma fram í sjónvarpsauglýsingunum og útvarpsauglýsingunum. Algjört hneyksli að það sé alltaf verið að plata fólk svona. Það er líka tvöföld merkingu í þessu innanlands dæmi. Gæti verið að fólk skilji þetta að maður geti farið á erlendar vefsíður bara ef þú ert “innanlands” á Íslandi.

Það er líka auglýst að maður geti fengið facebook í símann sinn sem er erlendur vefur og í sömu auglýsingu er auglýst 0kr á netið. Meikar ekkert sens. Ég vil annars nota tækifærið og óska honum Páli frænda mínum til hamingju með daginn. Orðinn 25 ára sem þýðir að hann þarf að fara að raka sig.

Læt mig að sjálfsögðu ekki vanta á sýninguna hans Sigurjóns í kvöld. Það er ennþá nokkrir klukkutíma þangað til að maður fer í sitt fínasta og skellir sér á Eyrarbakka. Þangað til þarf ég að gera ýmislegt. Ganga frá myndum. Sækja myndir í Pixla. Sækja myndir í ATH. Svo jafnvel lauma eins og einum þætti af The Wire í tækið. Virkilega miklir klassaþættir og mæli eindregið með þeim ef fólk hefur ekki séð þá.

Það er margt furðulegt við hvarf þessa manns í Esjunni í gær. Nokkrar staðreyndir um málið.

• Göngufólk mætir manninum í um 600m hæð
• Fólkið hefur samband við lögregluna og í framhaldinu hefst leit
• Fötin hans finnast í 200m hæð
• Bíllinn hans og skilríki finnast á bílastæðinu við fjallið
• Um 120 manns tóku þátt í leitinni sem og þyrlur, ekki samt 120 þyrlur
• Fólk sem þekkti manninn sagði að hann væri ekkert óvenjulegur

Það er gjörsamlega óskiljanlegt að maðurinn geti horfið svona sporlaust. Það er ýmislegt sem gæti mögulega útskýrt þetta.

1. Maðurinn virtist vera einn á ferð. Hann týndi 5.000kr heima hjá sér. Heldur að hann sjálfur hafi týnt því og þetta er leið fyrir hann sjálfan að handrukka sig.
2. Hann tapaði veðmáli. Hljóp upp á Esjuna. Áður en lögreglan kom á svæðið var hann kominn niður. Er núna inni í sama skáp og Annþór faldi sig í Mosfellsbænum og þorir ekki að koma út því það var svo kalt á hólnum.
3. Hann er að sviðsetja sitt eigið hvarf. Til að pottþétt yrði tekið eftir honum var hann nakinn. Keyrði hinum megin við Esjuna. Skildi eftir hjól og föt þar. Keyrði hinum megin við Esjuna aftur. Fór áleiðis upp í Esjuna. Fór þar úr fötunum til að vekja athygli þegar hann sá fólk. Mætti fólkinu. Fór yfir hólinn og í fötin á hjólið og er kominn hálfa leiðina á Þingvelli þar sem hann ætlar að haldast við í nokkra mánuði á húsbát á Þingvallavatni.
4. Eftir að hafa óvart horft á Impact Point með Brian Austin Green í aðalhlutverki fór maðurinn bara gjörsamlega yfirum með þessum afleiðingum. Á endanum bara sprakk hann og þess vegna finnst hann ekki.
5. Það sem göngufólkið hélt að væri nakinn Pólverji var í raun og veru ísbjörn. Og það sem var í raun og veru ísbjörn var í raun og veru kind. Og það sem í raun og veru var kind var í raun og veru hvítur steinn. Og það sem var í raun og veru hvítur steinn var í raun og veru bláber.

Það verður allavega virkilega gaman af því að sjá hvernig þetta mál endar. Og vonandi endar þetta vel. Eitt sem ég skil ekki í þessu er að það er maður týndur. 120 manns að leita að honum en hvergi birt mynd af honum. Hvernig á fólk að geta verið vart um ferðir hans ef það veit ekki hvernig pólstjarnan lítur út? Sem sagt miðað við að hann sé kominn í föt.

VIÐBÓT:
Maðurinn fannst látinn í suðurhlíð Esjunnar á ellefta tímanum í morgun. Þannig að mögulega fáum við aldrei að vita hvað kom fyrir þennan unga mann. Var eiginlega að vona að þetta hefði verið pæling númer 2 hjá mér. Að hann hafi tapað veðmáli og ekki þorað að gefa sig fram eftir að hann sá að það voru svona margir farnr að leita. En svo var því miður ekki.

Eins og þið, sem hafið komið hingað áður, sjáið þið að það er komið nýtt útlit á vefinn. Það sem þið kannski sjáið ekki þá er líka komið nýtt kerfi á bakvið vefinn. Ákvað að notast við WordPress sem er ansi hresst kvikindi verð ég að segja. Var búinn að notast við K2 kerfið sem hormjon gerði og eins og það þjónaði mér vel þá tel ég þetta vera skref í rétta átt. Skref áfram. Hljóma eins og einhver lyginn þingmaður þannig að best að hætta því. Mun líklegast reyna að plata hormjon til að færa færslurnar úr K2 yfir í WordPress. Það á víst að vera hægt með einhverjum göldrum og eins og fólk ætti að vita núna er hormjon galdramaður. Annað sem er nýtt eru nærbuxurnar mínar sem ég keypti í Hagkaup. Þær samt passa eiginlega ekki en það er önnur saga. Vonast til að með þesu útliti þá taki ég mig á í skrifum og skrifi á meira en mánaðarfresti eins og þetta var orðið undir lokin. Ég vil bara nota tækifærið til að bjóða sjálfan mig velkominn aftur.

Sigurjón sokkur eins og hann er kallaður er að fara að opna formlega Central Park sýninguna sína á föstudaginn næsta, 25.júlí. Opnunin er frá 19-22 og mæli eindregið að fólk mæti. Ef ekki á opnunina þá á þá daga sem sýningin er opin. Nánari upplýsingar um það hér. Sýningin er í Gallerý Gónhól, Eyrarbakka.

Ef þið komist ekki á sýninguna þá getið þið samt skoðað myndirnar sem eru að finna á henni hérna. Það er samt allt annað að sjá svona myndir hressilega stórar uppi á vegg eða litlar á vef. Þannig að mæting er málið.