Jæja lesendur góðir. Ákvað að henda inn smá færslu hérna til styrktar honum Sigurjóni. Hann er með íbúð í New York þar sem hann er í skóla. Hann er á leiðinni heim í sumar að vinna og ætlar að leigja kvikindið út. Nánari upplýsingar er að finna hér:

http://sigurjon.com/newyork/

Þar sem að Sigurjón er að koma til Íslands þá fylgir hann ekki íbúðinni.

Eini kakkalakkinn sem hefur fundist í íbúðinni er Sigurjón sjálfur. Það er sem sagt spegill í íbúðinni. Íbúðin er í East Village þannig að það er góður möguleiki að hitta einhvern úr The Village People sem er kostur.

Ef það vill svo heppilega til að einhver sé að gefa kettlinga þá má endilega láta mig vita og senda mér e-mail á arni@hamstur.is.

Þetta eiginlega gengur ekki. Það verður alltaf lengra og lengra á milli hamborgaradóma hjá mér og Pálusi. Hvað sem því líður þá er komið að dóm. Við frændurnir skelltum okkur fyrir dálitlu síðan á Grillhúsið í Tryggvagötu. Dómurinn kemur hér.

Grillhúsið

Maturinn:
Við pöntuðum okkur ostborgara, franskar og kóladrykk eins og venjulega. Við pöntuðum matinn á borðinu okkar. Fengum matseðil og alles. Veit ekki alveg hversu hrifinn ég er af því. Finnst alltaf slæmt að þurfa að borga eftir að ég borða. Fínt að ganga frá þessu strax. En þjónustan var rosalega góð þannig að það yfirgnæfði þennan ókost sem er að panta fyrst, borða svo og borga að lokum. Þegar við vorum búnir að panta var okkur boðið upp á súpu í forrétt. Fátt betra en að fá sér smá súpu til að undirbúa magann fyrir borgara.

Doldið grand að panta af matseðli en það hefur sína ókosti. Maður þarf að borga eftir matinn. Við vorum sáttir með súpuna. Gott magafylli fyrir komandi átök.

Það var ýmislegt að finna á borðinu sem við vorum ánægðir með. Það var í boði salt, pipar og kartöflukrydd. Einnig voru tannstönglar og hver átti heima í sínu eigin plasti. Annað er vibbi. Einnig var boðið upp á Dijon sinnep og það var lítil plastskeið til að veiða sér góða slummu upp úr. Það var einnig tómatsósa frá Heinz. Sem þýðir það að staðurinn er á móti George Bush og hvalveiðum. Kryddstaukurinn var vel hreinsaður. Kom vel úr honum.

Tannstönglar, salt, pipar, kartöflukrydd og Dijon sinnep.

En snúum okkur að borgaranum sjálfum og gosdrykk. Gosið kom í lítillri 33cl flösku. Það er í það minnsta fyrir kóksvolgra eins og mig og Pálus. Franskarnar voru stórar og þykkar og gómsætar. Kokteilsósan, sem fylgdi ekki með, kom í sér lokaðri dollu sem er plús. Borgarinn var góður. Brauðið var gott. Borgarinn var reyndar frekar sleipur. Rann hluti af honum ofan í kokteilsósuna. Borgarinn var lúmskt sveittur miðað við á hvaða stað við vorum á.

Franskarnar þykkar, borgarinn sleipur, lítil kók.

Staðurinn:
Grillhúsið er góður staður. Þjónustan er til fyrirmyndar og flæðið á matnum var ansi gott. Fengum strax súpu og um leið og súpan var búin þá var borgarinn mættur á borðið. Gátum líka hengt upp úlpurnar okkar á snaga við borðið. Mjög gott það. Við verðum samt held ég að fara aftur þarna í dulargervi til að kanna hvort að þessi þjónusta eigi bara við celeb eða alla sem koma þarna. Það er frekar strembið að fá stæði sem er ókeypis nærri staðnum. Þurftum að leggja dálítið frá til að fá frítt stæði. Þurftum að vaða skólp á leiðinni. Það er náttúrulega ekki gott mál.

Annað:
Þegar við vorum að fara söng einn þjónninn fyrir okkur. Veit ekki alveg hvað mér finnst um það. Fá góðan plús fyrir að hafa verið með blað og penna tilbúinn fyrir okkur til að punkta kosti og galla staðarins.

Samantekt:
- Franskarnar þykkar og góðar
- Fylgdi ekki með kokteilsósa
- En kokteilsósan var í lokuðu boxi
- 33cl kóksmábarn er ekki nóg fyrir stóra menn
- Súpan í forrétt var góður undirbúningur fyrir átið
- Staðurinn er á móti Bush og hvalveiðum… sem er að sjálfsögðu slæmt
- Þjónustan til fyrirmyndar
- Þurftum að leggja langt í burtu og vaða skólp
- Vel hreinsaður kryddstaukur

Stjörnugjöf:
Við gefum í hamborgurum og frönskum. Einn hamborgari jafngildir einni stjörnu og franskar jafngildir hálfri stjörnu. Við gefum mest fimm hamborgara.

Grillhúsið fær

Fyrri dómar:
- Vitaborgarinn
- American Style
- Red Chili
- Hamborgarabúlla Tómasar – Hafnarfjörður
- Brautarstöðin
- Anna Frænka
- Eikaborgarar

Er búinn að reyna að finna þetta helvítis myndband í dag og fann þetta loksins. Eftir Tottenham – Chelsea reyndi einhver Tottenham áhorfandi að kýla Frank Lampard en náði því ekki þar sem herra Frank dodgaði hann líka svona glæsilega. Það er búið að dæma áhorfandann í ævilangt bann frá White Hart Lane.

Það var afmælisgleði hjá honum Billa á laugardagskvöldið sem við Auður mættum galvösk í. Það var ansi kátt á hjalla og gleðin í fyrirrúmi.

Ég og Auður skelltum okkur einnig á Íslandsmótið í áhaldafimleikum að mynda. Ansi gott að hafa Auði á hægri kanntinum þar sem hún var í fimleikum á fyrri árum og þekkir því flest alla sem eru að keppa og veit hverjir eru góðir, hverjir geta gert hvaða stökk og hopp og snúninga, í hvaða átt þau gera brellurnar og fleira. Munar dálítið um það. Það var hún sem dró mig t.d. í fyrra á Norðurlandamótið þar sem ég tók myndina af henni Sif Pálsdóttur. Þannig að hún á alveg stóran þátt í þessari mynd.

Hendi inn nokkrum af mótinu inn á Flickr.

Já eftir dágóða bið er ég búinn að mixa rss fyrir síðuna mína. Sigurjón var búinn að kvarta ansi mikið í mér að ganga frá þessu svo hann gæti bætt mér við í Google Reader-inn sem er ansi sniðugt fyrirbæri. Þannig að loksins er þetta komið hjá mér. Sjáið hinn myndarlega, appelsínugula, rss hnapp hérna fyrir ofan í address barinu. Hendi jafnvel upp líka smá rss hnapp hérna á síðuna á hægri kanntinn jafnvel.

Ég setti líka inn smá prufu hérna til hægri. Þetta er shared items hjá mér í google reader. Þarna merki ég þær færslur á Engadget.com sem ég held að ykkur gætu þótt áhugaverðar. Og það birtast þarna 5 nýjustu shared item hjá mér. Endilega látið mig vita hvað ykkur finnst um þetta. Ef ykkur finnst þetta ósniðugt þá jafnvel hendi ég þessu bara aftur út.

Annars hefur síðan mín verið niðri hjá einhverjum allavega. Eitthvað smá DNS vesen þar sem ég gleymdi örlítið að borga reikninginn hjá ISNIC. Smá misskilingur í gangi En annars get ég sagt ykkur frá því að ef arni.hamstur.is virkar ekki þá er arni.mis.is yfirleitt hress. Segjum þetta gott í bili.

Ég hef tekið eftir því undanfarið að það virðist vera komin ný tíska hjá unglingum. Hef séð nokkra unglinga á vappi úti í frostinu í náttbuxum. Ætla rétt að vona að þau séu í einhverjum hlýjum fötum innan undir náttbuxunum því náttbuxur eru ekkert of hlýjar. Sá þetta í fyrsta skipti fyrir utan skalla hérna í Árbænum og datt helst í hug að það væri eitthvað náttfatapartý í Árseli. En þá sagði Auður mér að hún hefði séð fleiri svona og þetta væri greinilega tískufyrirbæri.

Ég er með hugmynd hvaðan þessi náttfatahugmynd hjá krökkunum er tilkomin. Ég er ávalt í náttbuxum þegar ég er heima hjá mér. Alveg vonlaust að vera í gallabuxunum inni hjá sér og því vel ég náttbuxur. Joe Boxer að sjálfsögðu. Það kemur fyrir að ég þurfi að stökkva út í bíl eða bílskúr að ná í eitthvað og þá nenni ég ekkert að skipta um buxur og stekk út á náttbuxunum. Mig grunar að krakkar hafi séð mig og fundist ég fáránlega kúl og ákveðið að gera það sama. Maður veit ekki.

Helgin var temmilega strembin. Á laugardaginn vaknaði ég snemma og stökk upp í Gerðarsafn með Billa í smá mix. Það tók svona klukkutíma. Fór síðan og keypti mér sófadjöful í Húsgagnahöllinni. Var mættur um 1300 upp í Egilshöll að mynda Val leika gegn Stjörnunni. Eftir það kíkti ég með hormjoni á Tækni og Vit sýninguna í Fífunni. Það var margt sniðugt þarna en ekkert neitt sérstakt ef ég á að segja alveg eins og er. Bjóst eiginlega við einhverju hressilegra en þetta. Eina sniðuga sem ég sá en vissi að var til og hafði séð áður var HD Sky útsending. Alveg skuggalega hress myndgæði í því. Gaurinn spurði okkur Hörð hvort við hefðum séð betri myndgæði en þetta og Hörður var ekki lengi að svara og sagðist hafa séð Blue Ray DVD mynd og gaurinn snarhætti við spurninguna og fór að tala um eitthvað annað.

Skellti mér síðan á bikarúrslitin hjá körlunum þar sem Stjarnan og Fram mættust. Stjarnan rúllaði þessu upp. Þetta var ansi hress leikur. Var nýmættur þegar Patrekur fékk skurð á hausinn og einhver rauðhærður risi hjá fram fékk skurð á hökuna. Það var smá stund að tjösla þeim saman en þeir héldu áfram. Svo voru auðvitað slagsmálin góðu sem ég veit eiginlega ekki nóg. Væri gaman ef einhver veit meira um þetta. Sá bara að allt í einu rúlluðu gæslumenn og hálf berir menn út á völlinn og mikil áflog. Þeim var síðan hent öfugum út og þeir reyndu að kasta einhverjum járnstykkjum í allt og alla. Fannst reyndar einn gæslumaðurinn ansi harður þegar hann kýldi hreinlega einn afbrotamanninn í síðuna og andlitið. Sýndi ég sjá það í fréttunum um kvöldið. Lögreglan sá þetta í beinni útsendingu og sendi strax 6 lögreglubíla sem voru mættir á svæðið eftir svona 5 mínútur og handtóku víst þrjár menn undir tvítugt. Ég er með eina getgátu um afhverju slagsmálin hafi byrjað. Spurning hvort að Guðmundur, þjálfari Fram, hafi verið að gefa stjörnuáhorfendum lúmskt puttann eins og sést á myndinni hérna fyrir neðan. Og þá hafi stjörnumennirnir orðið æstir og reynt að komast að Guðmundi til að refsa honum. En þá hafi öryggisgæslan stokkið á milli og stöðvað þá. Þetta á reyndar bara við ef þetta voru stjörnumenn sem voru með lætin.

Kommentakerfið er komið aftur í gagnið. Er búinn að banna grilljón ip tölur og eyða út slatta af kommentum sem voru að auglýsa einhver ástartæki með banana og perubragði. Þannig að ykkur ætti að vera óhætt að kommenta. Ef þið lendið í einhverju veseni að kommenta þá getið þið sent mér línu á arni@hamstur.is.

Það voru ansi hress slagsmál eftir leik Valenca og Inter í Meistaradeildinni í gær. Einn gaur í Inter var nefbrotinn. Á yfir höfði sér keppnisbann.

Get ekki sagt að ég sé sáttur með að bæði Liverpool og Chelsea hafi komist áfram í Meistaradeildinni. Svo gætu Manchester United og Arsenal bæst í hópinn á morgun og að hafa 4 ensk lið í átta liða úrslitum er bara leiðinlegt. Miklar líkur á að það endi 2 ensk lið í úrslitum sem mér finnst alltaf draga úr úrslitaleiknum.

Sáttur með Eið Smára samt að koma inn á og skora eitt stykki glæsimark. Barcelona gengið herfilega síðustu daga og Eiður ekki fengið tækifæri. Ég skil ekki afhverju hann var ekki notaður meira í Liverpool leikjunum. Hann hefur spilað manna mest af Barcelona mönnunum á móti Liverpool. Þannig að mér finnst afar furðulegt að hann hafi ekki fengið tækifæri. Það var orðið of seint þegar hann kom inn á núna á 70 mínútu c.a.