Var að reyna að skoða stöðuna í riðlinum á Eurosport þar sem að mbl.is er ekki alveg að standa sig í að uppfæra töfluna eftir leikina. En þeir hjá Evrópusporti er bara ekki heldur duglegir þannig að kannski er þetta upplýsingar sem koma frá Þýskalandi og mixast sjálfkrafa. En þarna á Eurosport vefnum er könnun og spurt er “Hver verður heimsmeistari?” Valmöguleikarnir eru Frakkland, Spánn, Danmörk, Þýskaland, Króatía, Rússland, Slóvenía eða Túnis.

Virkilega góð könnun þar sem t.d. Túnis, Slóvenía og hugsanlega Rússland komast ekki einu sinni áfram. Mæli með sem flestir fari þarna inn og kjósi Túnis til að mótmæla.

Það er ekki oft sem maður fær tækifæri á að slappa af um helgi. Hef tekið nokkuð gott slapp um þessa helgina. Skilaði af mér nokkrum geisladiskum á föstudaginn og smellti nokkrum myndum. Ekkert stórkostleg mikil vinna. Svo horfði ég á 24 og The Prestige með þeim Hugh Jackman og Christian Bale í aðalhlutverkum. Nokkuð skemmtileg mynd. Alltaf gaman af einhverju svona galdradæmi. Í það flóknasta samt þannig að maður þurfi alveg vel að fylgjast með hvað var að gerast. Hoppað fram og aftur og til hliðar í tíma sem var temmilega flókið en reddaðist fyrir horn. Svo var það hamborgari á skalla í kvöldmat og meira sjónvarpsgláp.

Fékk próförk af “Myndir Ársins 2006″ bókinni sem lítur glæsilega út. Styttist heldur betur í sýninguna. 17.febrúar klukkan 15:00 opnar sýningin og þá verður vonandi allt klárt. Það er allt á góðum tíma þannig að þetta ætti að sleppa allt saman.

Í dag svaf ég svo út sem ég hef ekki gert ansi lengi. Svo var bökuð apakaka sem ég gæddi mér á. Þakka Auði og Heiðu fyrir það. Það voru smá afgangar þannig að ég bjó til fallaðan kött sem var ekki síður myndarlegur. Ísland marði Slóveníu í handbolta. Það verður einhver að segja gaurunum sem eru að lýsa að jinxa ekki alltaf leik Íslands. Sögðu nokkrum sinnum á lykilstundu að Ísland gæti nú bara jafnvel tryggt sér sigurinn ef þeir skoruðu. Og að sjálfsögðu klikkuðu þeir. Það má ekki vanmeta jinxið. Ónei!

Eigum við ekki að segja að við tökum svo Þýskaland í bakaríið á morgun og vinnum riðilinn. Eða jafnvel ekki. Má ekki jinxa þetta. En sjáum hvað setur. Það er allavega fínt að vera komin áfram og þurfa ekki að leggja allt í sölurnar á morgun.

Í kvöld stefni ég á að borða kjúkling í matinn, ís með marsósu í eftirrétt og glápa á sjónvarpið og lesa próförkina yfir.

Segjum þetta gott í bili og vonandi höfðuð þið það álíka gott og ég um helgina.

Er ekki um að vera bjartsýnn eins og fólk var fyrir Úkraínu leikinn. Alltaf skemmtilegt þegar fólk er hreinlega búið að gera ráð fyrir að sigra leiki. Þetta var ekkert gífurlega flókið. Ísland var bara lélegt í þessum leik og það er bara þannig. Allir geta átt sína slæmu leiki og hlutirnar ganga ekki upp. Líka ef við hefðum unnið Úkraínu þá hefðum við örugglega á einhvern óskiljanlegan hátt samt ekki komist í milliriðil. Þetta er dálítið íslenska leiðin. Þannig að ég er sáttur að við töpuðum fyrir Úkraínu og þá getum við sýnt hvað í okkur býr og unnið tilvonandi heimsmeistara Fraka með 33 mörkum gegn 32.

Annars gerði ég heiðarlega tilraun að fara og mynda íslenska landsliðið í fjaðrabolta en það gekk heldur betur ekki eftir því það var klesst aftan á mig þegar ég var kominn svona 100m frá heimili mínu. Mér er ekki ætlað að mynda badminton. Óska því til hamingju að vera komið upp í A-riðil.

Páll E. benti mér á þætti sem heita Jericho. Ég sló til og tjékkaði á þeim og þeir komu bara skemmtilega á óvart. Þættirnir fjalla um smábæ í bandaríkjunum sem heitir Jericho. Einn góðan veðurdag sjá íbúar Jericho kjarnorkusprengju springa í Denver sem er nærri bænum. Heimurinn breytist á svipstundu og allt fer í ruglið. Það er ýmislegt sem kemur í ljós eftir því sem líður á þættina. Jafnvel fleiri sprengjur? Jafnvel stærri sprengjur? Jafnvel geimverur? Jafnvel ekki geimverur? Annars held ég að þið ættuð að tjékka á þessu þegar þetta byrjar á Skjá Einum 7.febrúar.

Ef einhver sendi mér tölvupóst í nótt/morgun þá hef ég mjög líklega ekki fengið hann. Þannig að ef þið voruð að senda mér eitthvað merkilegt þá mæli ég með að þið sendið mér aftur.

Yfirleitt er fólk að vinna á virkum dögum og á svo frí um helgar. Það er eiginlega ekki svoleiðis hjá mér. Ég vinn á daginn og kvöldin og á daginn um helgar og oft um kvöldin á helgum. Svo fæ ég stundum frí inn á milli en það hefur lítið verið um það á þessu ári allavega. Það hefur allt verið á fullu hjá mér að mynda og svo allt stússið í kringum Blaðaljósmyndarasýninguna. Bókin fer að fara í uppsetningu þannig að það er nóg að stússast í kringum hana. Um helgina var ég svo á fullu í tökum. T.d. á sunnudaginn var ég að mynda frá 13:30 og að ganga frá myndum og drasli langt fram á kvöld. Fór á báða Ísland-Tékkland leikina. Fékk Snorra Stein í andlitið á seinni leiknum. Eins gott að hann meiddist ekki og hefði verið frá á HM. Þá hefði það verið mér að kenna og DV birt heimilisfangið mitt og síma og ég hefði verið limlestur eða eitthvað verra. En ég held að hann hafi lifað þetta af og reyndar gerði ég það líka og vélin mín. Þannig að ég er góður á því. Reyndar mjög ánægður að þetta var Snorri en ekki t.d. Róbert eða Sigfús. Hugsa að ég hefði ekki einu sinni verið nálægt því að lifa það af.

Annars stefnir í fótbolta hjá mér bráðum. Tíminn hefst 22:30 og mikil spenna í gangi. Eiginlega eini tími vikunnar sem ég get hugsað um akkúrat ekkert nema að spila bara fótbolta. Ekkert vesen og ekkert stress.

To do listinn minn fer minnkandi sem er gott. En ég efast ekki um annað en að hann fer aftur vaxandi þegar líður á vikuna.

Apple kynnti á MacWorld fyrr í dag síma sem þeir kalla iPhone. Þetta er alveg svona frekar myndarlegur sími ef ég á að segja alveg eins og er. Þetta er líka ekki bara sími heldur myndavél, videospilari, ipod, vafri, e-mail skoðari og fleira. Hann kemur í Evrópu á fyrsta fjórðungi þessa árs var talað um. 8GB síminn mun kosta 599$ og 4GB 499$. Smellið hér til að sjá fyrstu myndirnar sem voru teknar af þessum nýja síma. Smellið hér til að lesa um MacWorld kynninguna.

Þetta er græja sem ég sé fyrir mér að ég vilji eignast.

© imdb.com

Ég hef reynt að vera duglegur að benda fólki á þætti sem mér finnst áhugaverðir. Var að finna nýjan þátt sem ég er nokkuð hrifinn af. Hann heitir “Friday Night Lights”. Þættirnir eru byggðir á myndinni Friday Night Lights sem kom út árið 2004. Ég var mjög hrifinn af þeirri mynd. Myndatakan frábær og bara góð mynd í alla staði. Ég var hálf skelkaður þegar ég byrjaði að horfa á þættina. Grunaði að það væri verið að herma eftir þessu en þetta væri meira í svona Smallville stíl. Sem sagt lélegur leikur og allt mjög ótrúlegt og bara í ruglinu. Mér finnst Smallville ágætis afþreying en ekkert meira en það. Friday Night Lights þættirnir komu mér hins vegar á óvart. Þeir eru í mjög svipuðum stíl og myndin. Fínn leikur og ekkert of óraunverulegt sem gerist. Það er líka ekkert of mikið sýnt úr fótboltanum (ameríska) sjálfum. Bara einstaka sinnum. Fjallar meira um leikmennina, þjálfarann og lífið þeirra. Þannig að ég ætla eindregið að mæla með þessum þáttum ef ykkur vantar eitthvað til að horfa á. Það er búið að sýna einhverja 11-13 þætti.

Jæja… síðasta vika/helgi var ansi löng og strembin. Forvalið fyrir sýningu Blaðaljósmyndara fór fram um helgina. Skilafrestur var á miðnætti á föstudaginn síðasta.

Föstudagur:
Á föstudaginn fór ég og Billi (sýningarstjóri) að sækja Terje Bringedal, sem var einn dómarinn, út á flugvöll. Hann er að vinna hjá VG í Noregi. Er myndstjóri þar. Skutluðum honum á hótelið og fórum í það að ganga frá myndunum sem voru komnar inn. Raða þeim í rétta flokka og fleira. Fórum síðan með hann út að borða um kvöldið og strax eftir það hófst mesta vinnan. Taka allar myndirnar og setja í flokka og athuga hvort allt sé rétt merkt og fleira. Vorum búnir að þessu c.a. 3:30 um nóttina. Skutlaði Billa heim og lagðist á kodda.

Laugardagur:
Vaknaði örfáum tímum síðar eða klukkan 8:00. Fór upp í Morgunblaðshús og kláraði að ganga frá síðustu myndunum og gera allt klárt fyrir dómnefndina. Dómnefndin var mætt klukkan 9:30 og dæmning hófst. Hún stóð yfir til c.a. 17:30. Það var farið yfir mikið af myndum og gekk vel. Um kvöldið var aftur farið út að borða með Terje. Var kominn heim um kannski 2:00 um nóttina.

Sunnudagur:
Dómnefndin var mætt klukkan 10:00 og dæmt var til 15:00 c.a. Þá var allt klárt. Búið að velja myndir í alla flokkana og verðlaunamyndirnar komnar á hreint. Svo kemur það í ljós 17.febrúar á opnuninni hverjir hluti verðlaun fyrir myndir ársins. Skutluðum Terje út á flugvöll en hann átti flug klukkan 17:00 aftur til Osló. Um kvöldið sendi ég síðan tölvupóst á alla sem fengu inn myndir á sýninguna.

Mánudagur:
Fór á fund með Eddu útgáfu sem ætlar að sjá um útgáfu af bókinni. Bókin fer vonandi í vinnslu bara strax um næstu helgi. Þessa vikuna verð ég að safna saman alls konar upplýsingum svo hægt sé að koma bókinni í gang.

Meira um forvalið á www.pressphoto.is.

Tók að gamni nokkrar myndir á Lomo-inn á Gamlárskvöld. Henti nokkrum inn á torfason.is. Smellið á myndina til að skoða þær.