Ætla mér að horfa á Barcelona-Chelsea í kvöld. Ég ætla að spá því að leikurinn fari 3-2 fyrir Barcelona og Eiður Smári skori 2 mörk af þessum þremur.

Það er kominn tími til á borgaradóm. Byrjuðum sterkir við Páll E. en svo fór þetta niður á við og það gafst ekki tími og eitthvað rugl bara. Skelltum okkur af stað aftur og við vorum ekki að ráðast á girðinguna þar sem hún er þynnst. Við fórum á American Style niðri í bæ.

American Style

Maturinn:
Það er eiginlega ekki hægt að byrja umfjöllun á American Style á öðru en frönskunum. Held að það sé enginn staður á landinu sem gerir eins góðar franskar. Þær eru margar, ljúffenga, semi sveittar og gómsætar. Jafn leiðinlegt að það er að nota tannþráð… jafn góðar eru franskarnar á Ameríska Stælnum. Hamborgarinn er stór, temmilega mikið grænmeti… mætti reyndar kannski sleppa einni gúrkunni en það er nú ekki stórmál. Kokkarinn (kokteilsósan) fylgir ekki með og maður þarf að borga sér fyrir hana sem er ókostur. Yfirleitt tekur hún líka dýrmætt frönskupláss en gerði það reyndar ekki í þetta skiptið. Máltíðin rennur niður eins og smjör á sjóðheitum líkama.

Það er “frí áfylling” sem þýðir líklegast ein frí áfylling. Hef reyndar aldrei fylgt þeirri reglu og hvað þá kókdrykkjusvólgurinn hann Páll. Bjó þetta orð til. Kókið er gott en glösin mættu vera stærri. 0,5l glös væru alveg málið.

Staðurinn:
Staðurinn er mjög stór og nóg af sætum. Öll sætin eru básasæti og það líka okkur. Fínt að vera í smá næði frá hinum. Ljósin fyrir ofan borðið fá hæstu einkun. Það er ekki að lýsa í augun heldur bara á mitt borðið. Mjög kósý stemmning. Maður gæti jafnvel boðið kærustunni fínt út að borða í sveittan borgara. Það var ekkert lesefni sjáanlegt sem er ekki alveg nógu gott því maður þarf að bíða eftir borgaranum í dálitla stund. Hins vegar er hægt að skoða myndir uppi á vegg… nema hvað við sátum við mynd af Tommy Lee á pungbindi. Ekki alveg nógu gott það.

Staðsetning:
Staðsetningin á þessum stað niðri í bæ er ágæt. Bílastæðin eru hins vegar vesen. Það þarf að borga í þau. Vorum reyndar heppnir og fundum stæði sem var 1:25 eftir af mælinum. En þetta gæti verið vandamál seinna. Mæli því frekar með einhverjum af öðrum AS stöðunum.

Samantekt:
- Hamborgarinn er stór og góður
- Franskarnar eru frábærar og skara fram úr
- Þurftum að borga fyrir kokktarann
- Frí áfylling fín en mættu vera stærri glös
- Verðið er ansi hátt en maður fær samt mikið fyrir peninginn
- Maður þarf að borga í stæði

Stjörnugjöf:
Við gefum í hamborgurum og frönskum. Einn hamborgari jafngildir einni stjörnu og franskar jafngildir hálfri stjörnu. Við gefum mest fimm hamborgara.

American Style fær

Fyrri dómar:
- Red Chili
- Hamborgarabúlla Tómasar – Hafnarfjörður
- Brautarstöðin
- Anna Frænka
- Eikaborgarar

Já gott fólk. Það er loksins komin helgi. Alltaf gott að fá eitt stykki svoleiðis. Vikan er búin að vera ágæt. Sæmilegt að gera. Er að leggja lokahönd á vefsíðu sem fer í loftið á mánudaginn. Segi ykkur frá því seinna. Mamma á afmæli í dag… eða gær. 27.okt sem sagt. Hún og pabbi skelltu sér yfir helgina til Madríd í tilefni dagsins. Heyrði í þeim í dag og þau voru bara að tjilla feitt í góða veðrinu. Planið á morgun er að kaupa örbylgjuofn þar sem að sá sem er hérna núna er frá 1989 og hann er formlega ónýtur. Ótrúlegt hvað hann hefur staðið sig vel. Mæliði með einhverjum nettum? Annars er von á óvæntum glaðning hérna á síðunni minni seinna í dag, laugardag. Fylgist með. Kveð ykkur í bili.

Það er enn og aftur búið að hækka bíóverðið. Hækkunin er 100 krónur og kostar því nú 900 krónur að fara í bíóhús. Það hlýtur að eiga við um öll bíóhúsin. Erum við að tala um ólöglegt samráð? Man einhvern tíman var sagt að bíóverð hafi hækkað því dollarinn hafi hækkað svo mikið. Svo lækkaði dollarinn en verðið hélt bara áfram að hækka. Furðulegt það. En þetta er ekkert flókið. Maður bara fer ekkert í bíó nema ef maður vinnur bíómiða.

Síðustu dagar voru ansi fljótir að líða og Airwaves 2006 er formlega búin. Þetta var hressandi hátíð eins og alltaf en það var eitthvað við hana sem gerði hana ekki eins hressa og í fyrra. Veit ekki nákvæmlega hvað það var en það var eitthvað.

Það sem ég sá í gær var Siggi Ármann, Ólöf Arnalds, Kira Kira, Joseph Marzolla, Daníel Ágúst, Pétur Ben, Biggi, Leaves, The Cribs og Kaiser Chiefs. Var sem sagt með annan fótinn á Iðnó og hinn fótinn í Hafnarhúsinu. Það var einstaklega gaman að mynda Daníel Ágúst. Hann er líflegur á sviðinu og þegar ég segi líflegur þá meina ég geðveikur og hoppandi út um allt, tungan út og hægri snú. Afar skemmtilegt myndefni þar á ferðinni. Sá Pétur Ben í fyrsta skipti og var hrifinn. Var aðeins búinn að hlusta þannig að ég vissi svo sem hverju ég átti von á. The Cribs og Kaiser Chiefs voru ekki eins góðir og ég átti von á. Smá vonbrigði þar en svo sem ekkert hægt að gera í því. Fann litla myndavél á gólfinu í Hafnarhúsinu sem einhver hafði greinilega misst. Þannig ef einhver saknar myndavélar þá getiði haft samband. Mun svo smella henni á morgun í óskilamuni hjá Airwaves eða í Hafnarhúsinu.

DANÍEL ÁGÚST @ Listasafn Reykjavíkur

LEAVES @ Listasafn Reykjavíkur

PÉTUR BEN @ Listasafn Reykjavíkur

THE CRIBS @ Listasafn Reykjavíkur

KAISER CHIEFS @ Listasafn Reykjavíkur

Þriðja kvöldið af Iceland Airwaves 2006 er afstaðið og stóð ég það af mér. Sem og fimmtudagskvöldið var ég í Hafnarhúsinu og sá þar Baggalút, Benna Hemm Hemm, Islands frá Kanada, Apparat Organ Quartet, Jakobínarínu og The Go! Team frá Bretlandi.

Kántrýsöngur er ekki alveg að mínu skapi og því fer ég strax yfir í að segja að Benni Hemm Hemm voru góðir. Eftir Benna komu Islands frá Kanadíu og í hljómsveitinni er einn kúl söngvari og svo asísk-kanadískir lúðar með fiðlur að vopni og nintento belti. Nintendo beltið var reyndar frekar kúl en hvítu fötin og taktarnir voru það ekki þannig að þeir voru á heildina litið ekki kúl. Og ef einhver fer að væla að ég hafi sagt að asíubúar séu ekki kúl þá getið þið sleppt því. Nenni ekki að standa í rifrildum við ykkur. Apparat Organ Quartet eru með merki og allir sem eru með merki eru kúl og það er ekki flókið. Jakobínarína hoppuðu út um allt og út af sviðinu og hingað og þangað og enduðu svo með því að henda öllu um koll á sviðinu. Það var sniðugt þegar fyrsti tónlistarmaðurinn gerði það en ekki svo mikið núna. Svona svipað eins og að stela ljósmyndahugmyndum. Það er bara ekki kúl því miður. En þeir eru samt hressir og gaman að mynda þá þannig að þeir eiga gott skilið. The Go! Team voru bara leiðinleg og læt ég þar við sitja.

Endaði kvöldið á pylsu á Bæjarins Bestu og var það án efa besta pylsan sem ég fékk í gær. Hljómaði þetta illa?

Læt fylgja þessari færslu þrjár myndir frá gærkvöldinu. Fyrsta er af Islands-söngvaranum með gervihöndina sína sem hann stal líklegast af Buster. Önnur er af Benna Hopp Hopp og sú þriðja Jakobænaræna.

ISLANDS @ Listasafn Reykjavíkur

BENNI HEMM HEMM @ Listasafn Reykjavíkur

JAKOBÍNARÍNA @ Listasafn Reykjavíkur

Það var heldur meira fjör á öðrum degi Airwaves heldur en þeim fyrsta. Ég hef ekki gert það oft en ákvað að vera á sama staðnum allan tímann. Sá um að mynda það sem fyrir augu bar í Listasafni Reykjavíkur, betur þekkt sem Hafnarhúsið. Það sem fyrir augu mín bar þar var Ske, Mates of State, Hot Club de Paris, Tilly and the Wall, Klaxons og svo loks Mugison. Það var fín stemmning þarna. Yfirleitt mikið af fólki nema kannski á Ske þar sem klukkan var rétt um 19 þegar þeir byrjuðu. En engu að síður var sæmilega hresst fólkið sem var mætt. Á eftir Ske kom Mates of State… sem var svona lala bara. Hot Club de Paris voru þrír hressir gaurar sem allt í einu reyndu að beatboxa við a capella söng sem var hálf furðulegt og ekki að mínu skapi því þeir gerðu það ekki vel fannst mér. Eftir alla þessa stráka komu 3 stelpur sem voru hálfgerðar rokk Spice Girls eins og einn ágætur ljósmyndari orðaði það. Þær voru klæddar í furðulegan fatnað en það sem kom út úr þeim var ansi hresst. Tvær sungu og spiluðu á gítar en sú þrðija stappaði í gólfið af miklum krafti. Hressar píjur þar á ferðinni. Heldur betur æstist leikurinn þegar Klaxons stigu á svið. Einn gaurinn var ofvirkur og hljóp með gítarinn út um allt og niður af sviðinu og hingað og þangað hettuklættur. Voru samt nokkuð þéttir og áhorfendur virkilega að fíla þá. Kvöldið endaði Mugison sem er að spila sitt síðasta gigg í hálft ár og hann var að spila fyrir stelpurnar þannig að ég yfirgaf húsið eftir 2-3 lög. Enda ekki verið að syngja fyrir mig. Þetta var gott kvöld á heildina litið.

Ákvað að setja þessa mynd af Tilly and the Wall inn. Fannst hún dálítið öðruvísi og ná að fanga stemmninguna sem var þarna. Steppandi óð kona og önnur í hvítu pilsi og korsilettu og sú þriðja öllu venjulegri að syngja.

TILLY AND THE WALL @ Listasafn Reykjavíkur

Í gær hófst hin árlega Iceland Airwaves hátíð. Hef verið með vélina á lofti þar síðustu 4 árin held ég ef ekki lengur. Fyrsta árið mitt sem ég myndaði var þegar The Hives, Blackalicious og FatBoy Slim. Það var 2002 er ég nokkuð viss um.

Kvöldið í gær var ágætt. Þetta byrjar alltaf rólega. Stemmningin ekki orðin nógu hress. Vona að það skáni í kvöld. Það sem ég sá fyrsta kvöldið var Spaceman, Kenya Nemor, DJ Platinum, Bent, Fræ, Original Melody, Forgotten Lores, Dikta og We are Scientists. Það er ekki flókið að segja frá því að Dikta stóðu upp úr. Er mjög hrifinn af því bandi. We are Scientists voru líka mjög fínir. Náði samt ekki að sjá þá alla þar sem ég þurfti að vera mættur að mynda Fræ. Fræ komu á óvart. Hef ekkert verið rosalega hrifinn af því sem ég hef heyrt í útvarpinu en þeir komu bara skemmtilega á óvart.

Ætla að smella einni mynd hérna eftir hvern dag. Kannski af því bandi sem mér þótti skemmtilegast eða einfaldlega myndin sem ég var mest hrifin af eftir kvöldið. Hér kemur sú fyrsta.

DIKTA @ Gaukurinn

Mér varð smá brugðið þegar ég sé baksíðuna á mogganum í dag. Þar var grein um einhvern strák sem setti víst upplýsingar um bekkjarsystur sína inn á einhvern einkamálavef. Stuttu seinna fóru einhverjir dólgar að hringja í aumingja stúlkuna. Fékk víst 11 símtöl á klukkutíma. En mér var svo sem ekki brugðið við það að hann hafi gert þetta en mér varð brugðið að myndin við fréttina sýndi vefinn minn sem tengist þessu máli ekkert. Þetta var mynd sem þorvaldur tók fyrir einhverja allt aðra frétt á sínum tíma. Vildi bara koma þessu á hreint að engar einkamálaauglýsingar eru að finna hér og ég stunda það ekki að setja upplýsingar um aðra á einkamálavefi.

Hjalti fær plús í kladdann fyrir kommentið hérna í færslunni fyrir neðan Hélt að enginn myndi taka eftir þessu að þetta væri vefurinn minn. Þetta er mynd af síðasta útliti vefsins.

Annars er það Airwaves í kvöld og hér læt ég fylgja með nokkur kvikindi frá því í fyrra:

Jú… ég lærði það að konur sem eru að mála sig í umferðinni eru lítið að fylgjast með hvað þær eru að gera. Ég lærði að það er óþarfi að segja ókunnugu fólki að ég hafi bara verið að sækja mixerinn. Og síðast en ekki síðst lærði ég að það er ekki sniðugt að hlaupa í hettupeysu ef maður er með síma í hettupeysuvasanum. Því að þá flýgur síminn úr vasanum og undir að minnsta kosti þrjá bíla. Sem er vesen.