Haha. Var að skipta yfir á Skjá Einn. Sá akkúrat þar sem var verið að taka viðtal við stúlkuna sem var í síðasta þætti. Og þau voru að spyrja hana út í afhverju hún hefði ekki valið þann sem fékk flest stig. Og hún var eitthvað að tala um að hún hefði ákvað að velja þann sem fékk fæst því hún vildi eitthvað allt öðruvísi. Og stjórnendurnir spurðu hana þá “Fékkstu ekkert merki utan úr sal að þú ættir að velja hann”. Og hún “Nei ég nota gleraugu þannig að ég hefði ekki getað séð það”. Greinilega fékk hún merki út úr sal því þetta var furðulegt mjög og fólk hefur kvartað. Og þau hafa ákveðið að taka á þessu svona að spyrja hana út í þetta. Það vita allir að þetta er þannig að vinirnir utan úr sal gefa viðkomandi merki og það er öllum held ég nokk sama.

Þú málar veggi er það ekki?

“Pamela Anderson óttast að geta aldrei gifst aftur, því enginn maður standist samanburð við fyrrverandi eignmann hennar Tommy Lee. Fyrrum strandavarðagellan, sem skildi við Tommy eftir að hann barði hana fyrir framan syni þeirra tvo, segir að hann sé enn þá stærsta ást lífs síns.”mbl.is

Það er svo gaman að heyra svona frásögn um hana elsku bestu Pamelu. Sýnir bara hvað hún er einstaklega gáfuð og klár. Auðvitað elskar maður þann mann mest sem ber mann fyrir framan sem flest börn. Kid Rock hefur ábyggilega bara lamið hana svo enginn sæi til. Þannig að hann kemst ekki nærri Tommy í elskulegheitum.

Var að lesa almennilega þessar athugasemdir sem netfrelsi.is sendi þingmönnum varðandi breytingar á höfundarlögum. Þið getið lesið þetta hjá þeim hérna.

Ég hafði aðallega áhuga á breytingum sem þeir vilja gera á rétti ljósmyndara. Samkvæmt tillögu þeirra vilja þeir hafa það þannig að ljósmyndari afsali sér algjörlega höfundarétti á ljósmynd eftir að þeir hafi tekið hana fyrir þann aðila sem bað um hana.

Þetta er brot úr klausunni hjá þeim: “Eðlilegt er að ljósmyndari sem tekur myndir samkvæmt beiðni og gegn þóknun afsali sér öllum rétti til ákvarðanatöku um hvort birta megi myndina enda er í þeim tilvikum sem hér um ræðir einungis um að ræða mann sem tekur að sér visst verk.”

Þetta er svo mikil vitleysa að ég trúi ekki öðru en að þingmenn fleygi þessu í ruslið hjá hinu draslinu.

Ég ætla ekki einu sinni að ræða þetta frekar þetta er svo rosalega heimskulegt.

Veit einhver hvaða furðufuglar standa fyrir netfrelsi.is. Ef svo er þá er spurning um að afneita þeim sem fyrst ef þið þekkið vel.

Hva… er Akureyrarbær eitthvað fátækur? Þeir eru bara með fjórðungssjúkrahús.

Nútíma læsingar fara virkilega í taugarnar á mér. Gömlu læsingarnar voru að virka alveg bærilega þannig að sá sem ákvað að breyta þeim er á hraðri leið til helvítis. Gömlu læsingarnar eru mjög einfaldar. Þegar maður er fyrir utan húsið er húsið læst. Til að opna það snýr maður lykli og hurðin opnast. Síðan lokar maður hurðinni og þá er húsið læst. Síðan þegar maður fer aftur út þá opnar maður hurðina og lásinn og síðan lokar maður hurðinni og hurðin er læst. Síðan er möguleiki á því að taka úr lás ef maður vill. En núna eru komnar hinar og þessar nýjar læsingar og lyklar sem eru ekkert nema bara vesen.

Ein af þessum heimsku nýju gerðum virkar þannig að það er ekki hægt að læsa hurðinni nema með því að hafa lykil. Svona svipað eins og á bifreið. Tilgangurinn er bara enginn og þetta er bara vesen. Það tekur langan tíma að læsa þegar maður er að fara út. Og svo ef maður er ekki með lykil þá er ekki hægt að yfirgefa húsið nema að skilja eftir opið. Og það vill maður ekki gera. Þannig að maður getur ekki skilið einhvern eftir í húsinu og látið viðkomandi læsa.

Svo er annað með læsingar sem er hægt að snúa annað hvort einu sinni eða tvisvar. Maður veit aldrei hvort að maður er búinn að opna eða þarf að snúa einu sinni til viðbótar. Þetta á ábyggilega að vera eitthvað öruggara eða eitthvað. Það hefði verið einfalt að láta bara helvítis draslið snúast lengra inn með einum snúningi. Það er bara verið að plata fólk með þessu helvíti.

Ég vil vinsamlegast eða allar svona læsingar verði teknar úr notkun sem allra fyrst. Þegar ég kaupi mér íbúð eða hús þá læt ég skipta yfir í venjulega læsingu ef það er einhver svona heimskuleg læsing.

Doldið fyndið með þetta nýja dagblað sem á að heita blaðið að gaurarnir sem eru að standa fyrir þessu harðneituðu að þeir væru að fara að byrja með blað þangað til eiginlega bara í dag. Spurning hvort að fólk trúi mönnum sem byrja á því að ljúga upp í opið geðið á öðrum fjölmiðlum.

Núna er stór hluti þjóðarinnar sem er í vinnu. Yfirleitt er fólk að vinna svona 8 tíma á dag og gerir því lítið annað á daginn. Svo við um 19:00 kemur fjölskyldan saman við matarborðið og þar sem allir hafa verið að vinna allan daginn þá vill það verða svo að fólk er að segja sögur úr vinnunni. Þetta eru svokallaðar “vinnusögur” sem enginn nennir í rauninni að hlusta á því þær eru yfirleitt svo innilega óáhugaverðar. En fólk segir yfirleitt ekki neitt af kurteisissökum en áttar sig samt ekki á því að það sjálft segir jafn óáhugaverðar sögur.

Dæmi um sögur:
- Það var rosalega fyndið sem gerðist í vinnunni í dag. Við vorum búnir að vera á fullu tveir allan daginn að hlaða Trópí í kassa því það átti að senda þetta eitthvað austur fyrir einhverja kynningu. Kalli var alveg búinn á því og fékk sér sæti á einum trópístaflanum. Og hann var eitthvað að grínast með að Óli hefði ekki fengið sér trópí í hádeginu. Þá kom Gísli og sagði að við ættum ekki að stafla trópí því það var búið að færa dagsetninguna. Þá varð Óli alveg brjálaður og fór í staðin með þykkni niður á svæði B. Hann átti að fara með á svæði A. Og við félagarnir sprungum úr hlátri.

- Það kom maður inn til mín í dag sem sagðist hafa keypt buxur í stærð 34/36 en svo þegar hann kom heim þá átti hann alveg eins buxur. Hann vildi skipta buxunum en það er náttúrulega ekkert hægt því að þetta voru útsölubuxur. Og þá þurfti ég að útskýra fyrir honum hvernig þetta var. Og svo endaði með að kærastan hans keypti bara nýjan bol. Og ég sagði við Gunnu sem er að vinna með mér: “Þeir væru nú sáttir hjá höfuðstöðvunum ef þeir hefðu séð þetta.” Því hún var búin að vera í útistöðum við þá. Það er löng saga. En allavega svo fórum við í mat og þá hittum við sama gaur og hann heilsaði okkur. Og við gáfum hvor annarri fæv. Þetta var geðveikt fyndið. Því að kærastan var komin í eins skó og Lalli á lagernum var í á skemmtanakvöldinu í síðustu viku.

- Það var maður sem hringdi í mig í dag og ætlaði að spyrja hvort hann gæti stækkað lóðina sína um 2/3 úr heildarstærð íbúðarinnar. En hann var greinilega ekki að skilja að maður þarf að vera búinn að fá samþykki frá bæjarstjórninni og skriflegt leyfi frá garðari niðri í skráningu. Og hann var ekkert að skilja. Þannig að ég þurfti að senda honum tölvupóst með upplýsingum um þetta. Og svo benti ég honum á Verkfræðistofu sem hann gæti látið laga þetta fyrir sig.

- Í vinnunni í dag elduðum við okkur pylsur í hádeginu og viti menn. Remúlaðið var búið þegar fyrsti var búinn að fá sér. Þá þurfti ég að fara að kaupa meira. En þá þegar ég kom út í búð keypti ég teppi í staðin fyrir remúlaði.

Þetta eru alltaf sögur sem enginn skilur nema þeir sem voru á staðnum. En samt er fólk knúið til að skila þessum sögum áfram til fjölskyldunnar sinnar. Ég held að það sé ekki nein lausn á þessu. Fólk á eftir að segja slæmar sögur þangað til að mannkynið líður undir lok. Svona er þetta bara.

Það er nemi í viðskiptafræði í HR sem er með smá könnun. Ef þið eruð orðin þreytt á að skoða klámið sem internetið hefur upp á að bjóða þá getið þið tjékka á könnuninni hérna. Þetta er könnun um kvikmyndir á netinu og niðurhal og skemmtilegheit.

Mér finnst eiginlega smá svindl að Sigurjón.com hafi ekki verið valinn Páfi þar sem kvikindið á nú einu sinni afmæli.