Ég hef það ágætt fyrir utan að ömmu minni var rænt. Þetta er stórfurðulegt og ótrúleg saga. Fengum ekki að hitta ömmu í meira en ár og þar á meðal yfir jólin. Henni var haldið í gíslingu af skyldmenni mínu. Reyndum allt hvað við gátum en kerfið á Íslandi er bara svo meingallað að það nær engri átt.

Ég lét það bara vera að segja fólki frá þessu þar sem þetta var svo ótrúlegt að ég efaðist hreinlega að fólk myndi trúa mér.

Þorsteinn J. er að gera heimildarmynd um ofbeldi á gömlu fólki og er amma þar í aðalhlutverki.

Getið séð video-in á vef Þorsteins J.
Ása Amma I
Ása Amma II

Frekar svekkjandi fyrir þá seku að lögfræðingurinn ógurlegi Johnnie Cochran er látinn.

Í dag eru páskarnir og skemmtilegt er sjónvarpið ekki. Einhver prestkona að tala eitthvað “líkklæðin ein” á RÚV. Ekki gaman af því. Sjálfstætt fólk og ballettdansari á Stöð 2 og Pizzaauglýsing á PoppTíví. Þannig að ég er að horfa á “Allt í drasli”. Þessi þáttur er svo mikið drasl að það nær engri átt. Þetta á líklegast að vera að herma eftir þáttum eins og Queer Eye for the Straight Guy eða eitthvað. En klósettpappírselskandinn og hvíthærða furðukonan eru ekki að gera neitt nema bara að taka til í húsinu hjá fólki. Það er ekki verið að gera neitt flott. Bara þrífa kúk og piss af klósettgólfinu og dauða ketti og kanínur úr eldhúsvaskinum. Svo er komið að fólkinu sem tekur þátt í þessu. Það bara hlýtur að vera eitthvað aðeins skrítið í kollinum. Og þegar ég segi skrítið meina ég snargeðveikt! Ef fólk þrífur heimilið sitt og sjálft sig svona illa þá getur ekki verið að það vilji auglýsa það í sjónvarpinu. T.d. núna var einhver Helgi sem er forritari og piparsveinn. Þær stúlkur sem sáu þennan þátt eru held ég ekki að fara að hoppa í fangið á honum næst þegar þær sjá hann á Linuxráðstefnu í Safninu í Kópavogi.

Ég held að það sé deginum ljósara að við eigum að neyða Bobby Fischer til að velja á milli þess að spila með íslenska landsliðinu í handbolta eða íslenska landsliðinu í fótbolta. Ef hann neitar þá verður hann framseldur til Gyðingalands þar sem hann verður líklegast borðaður á næstu páskum.

Hlaupa 2 hestar hraðar heldur en einn?

Sigurjón er vaknaður til lífsins á ný. Smart síða hjá drengnum. Hann fær plús fyrir þetta skal ég segja ykkur.

Ég vil nota tækifærið og óska gullfallegu kærustunni minni til hamingju með afmælið.

Á laugardagskvöldið skelltum við Auður okkur ásamt honum Pálusi á tónleika á Bar 11. Þar litu dagsins… kvöldsins ljós hljómsveitirnar Dikta og Days of our Lives. Eða held að þeir síðari hafi heitið það. Það var margt um manninn og þegar ég segi margt um manninn þá meina ég ég, auður og páll. Bar 11 er mjög langt frá því að vera besti tónleikastaður á Íslandi. Allir á efri hæðinni sitja ofan í hljómsveitinni. Sumir hljómsveitarmeðlimir þurfa svo að sitja bakvið hátalara til að allir komist fyrir. Svo er þetta allt of hátt og furðulegt. Þegar smá var liðið á fyrri leikana fóru ljósin að styrkjast og veikjast til skiptist. Nú hélt ég að gamanið… eða ekki gamanið væri búið og rafmagnið væri á leiðinni af. En svo var ekki. Þetta var sem sagt ljósamaðurinn að gera vinnuna sína. Sem sagt hreyfa dimmerinn upp og niður í takt við trymbilslátt trommarans. Virkilega furðulegt verð ég að viðurkenna. Svo byrjuðu Dikta sem voru alveg hreint fínir bara. Einn gaurinn í hljómsveitinn lítur alveg út eins og læknir í seinni heimstyrjöldinni. Og þá með Hitler og félögum í liði.

Já kallinn er bara kominn aftur í bæinn. Er búinn að vera síðustu daga fastur á gúmmíbát fyrir utan Horn á ströndum. Planið var að fara rétt út fyrir til að ná betra skoti af ísnum sem er að lúra sér þarna. Planið gekk frekar illa þar sem að það var ekki pláss fyrir myndavélina í gúmmíbátnum. Þannig að ég tók með mér blað og blýant til að skissa mynd af þessu. Þegar ég var búinn að skissa í svona 2 mínútur þá brotnaði blýið og ég var ekki með yddara. Þá ætlaði ég að smella mér bara í land en árarnar sem ég keypti mér á www.ararnarhansarna.org voru ekki að virka sem skyldi þar sem þær voru gerðar úr þýskum eyrnamerg. Ég rak lengra og lengra út á sjó. Fannst fyrir tveimur dögum í höfninni í Rotterdam. Ég var hættur að geta talað vegna kulda en sem betur fer var ég með merkimiða kisunnar minnar um hálsinn á mér þannig að það var hægt að skila mér til Íslands. Ég missti tvær tær og fjóra putta og er það ástæðan fyrir því hversu lengi ég hef verið að skrifa þetta. Einn dagur og 3 klukkustundir. Er að hita mér jarðarberjastafasúpu til að hlýja mér. Ég kannast samt ekki við fólkið sem á heima hérna. Er ekki 100 prósent viss um að ég sé heima hjá mér. Kemur í ljós í kvöld þegar ofnarnir fara að hitna.

Við Páll E. spáðum Hildi Völu sigri í Idolinu í fyrra þegar hin keppnin var í gangi. Vissum þá ekki einu sinni að hún myndi taka þátt. En það er ekki til ritað neins staðar þannig að enginn trúir okkur sem er hið besta mál. Við erum stórir og sterkir og lemjum ykkur bara.

Hins vegar sagði ég þetta 10. febrúar.