Það eru 209 dagar síðan ég bloggaði síðast. Það er nær því að vera ár heldur en ekki ár. Ef ég gæti og fyndi verðlaunin sem ég fékk fyrir besti einstaklingsvefurinn á sínum tíma þá myndi ég skila þeim. Félagi minn Sigurjón er kominn á fullt skrið í bloggheiminum aftur og var það að hluta til ástæðan að ég ákvað að rífa mig upp af rassinum og læða inn nokkrum orðum. Eins og einhverjir vita ákvað ég að fjölga mannkyninu á síðasta ári og afraksturinn leit dagsins ljós 5.apríl 2010. Elísa mætti á svæðið organdi eins og hamstur.
Ég ætla ekki að fara að rifja upp allt sem hefur drifið á mína daga síðan ég bloggaði síðast enda líklegast hef ég ekki minni til þess. Held það sé best bara að byrja frá þessum punkti og halda áfram.
Jæja ákvað loksins að skella mér á Avatar í 3D. Aldrei séð fullorðið fólk troða sér jafn mikið inn í bíó síðan ég sá Lion King. Þar sem ég nota gleraugu gerði ég ráð fyrir að ég þyrfti að fara með linsur sem ég og gerði. Ég er svo óreyndur að hafa linsur að í síðasta bardagaatriðinu nuddaði ég aðra linsuna úr auganu á mér þannig að þrívíddin var ekkert alveg nógu hress þarna síðustu metrana. Svo prufaði ég nokkru seinna 3D gleraugu ofan á venjuleg gleraugu og það virtist alveg ganga. Þannig að ég prufa það kannski næst.
Ég var búinn að heyra að þetta væri geðveikt og rosalegt og fólk væri að drepa sig því að þetta væri svo flott. Var líka búinn að heyra að myndin væri ekkert frábær þannig að ég bjóst ekki við neinu frábæru svo sem hvað söguna varðar. Sagan fannst mér bara ágæt. Ágætis vona B-skemmtun sem er ekkert að. En þrívíddin fannst mér alls ekki hress. Stundum var þetta rosalega flott og fínt en yfirleitt var ekkert í fókus, sérstaklega þegar það hreyfðist eitthvað á skjánum. Og það er doldið að gerast í kvikmyndum. Svo fannst mér líka t.d. þegar eitthvað gerðist í litlu rými að fólkið sem var fyrir aftan það sem var í fókus allt of nálægt. Eins og það væri verið að nota 400mm linsu á stað sem það er augljóslega ekki hægt. Skelfilegast fannst mér samt að vera með texta á myndinni. Hann var alltaf í fókus en það meikar ekki sens að vera með eitthvað tvennt í fókus. Sem sagt bæði einhverja persónu í bakgrunni og svo textann í forgrunni.
Herra Kamerún hefði nú alveg mátt eyða eins og 3 árum til viðbótar og gera þetta almennilega.
Flott þegar það líður mánuður á milli skrifa hérna. En svona er þetta nú bara. Það hefur ýmislegt gerst hjá mér frá því 18.desember. Hérna kemur kannski það helsta.
Fyrirlestur í Ljósmyndasafni Reykjavíkur.
Við Billi héldum fyrirlestur um gerð ljósmyndafrásagna í Ljósmyndasafni Reykjavíkur í samvinnu við safnið og Blaðaljósmyndarafélagið. Max Houghton, ristjóri Foto8 tímaritsins, hélt fyrirlestur á undan okkur. Huga að um 100 manns hafi mætt sem er ansi góð mæting. Það er verið að vinna úr upptökum af þessum tveimur fyrirlestrum og kanna hvort það sé hægt að henda þessu á netið fyrir þá sem ekki komust. Þ.e.a.s. ef það er áhugi fyrir því. Við kynntum líka á fyrirlestrinum vefinn Miro.skara.is sem er ætlaður til að kynna ljósmyndafrásagnir fyrir íslenskum fjölmiðlum og hversu vel virkar að nota svona frásagnir í blöðin. Við erum alveg á því að þetta er það sem fólk vill. Fyrirkomulagið á þessum vef verður þannig að ljósmyndarar senda okkur myndir og síðan fáum við gest í ritstjórn í hverjum mánuði og út kemur eitt nettímarit í hverjum mánuði.
Myndir Ársins og World Press Photo
Tók saman nokkrar myndir bæði fyrir Myndir Ársins og World Press Photo. Myndir Ársins opnar 6.mars 2010 og úrslit verða kunn í World Press Photo einhvern tíman í febrúar held ég.
Nintendo
Fundum í geymslu gömlu Nintendo tölvuna hennar Auðar. Erum með nokkra leiki og þar á meðal Super Mario Bros sem hefur mest verið spilaður. Núna er verið að reyna að grafa upp hvort einhver eigi Super Mario Bros 3.
Rakst á síðu á netinu sem heitir Very Awesome World.com þar sem maður að nafni Dallas Clayton hefur stofnað góðgerðarsamtök sem snúast um það að fá krakka til að lesa og fá krakka til að dreyma. Hann er á ferðalagi um Bandaríkinn og heiminn þar sem fyrir hverja bók sem er seld gefur hann eina bók. Fer í skóla, sjúkrahús og fullt af stöðum þar sem krakkar og fólk getur haft not af bókinni hans. Hægt er að kaupa eintak af bókinni á veryawesomeworld.com. Ég veit ekki með ykkur en ég er búinn að versla mér bók. Látið orðið ganga.
Gerði tilraun í síðustu viku og það var að eiga ekki til kók hérna á heimilinu. Kaupi alltaf 33cl dósir sem er án efa besta kókið. Ef einhver reynir að plata þig og segja að kók með glerbragði sé betra þá er hann að plata þig og þú sjálfan þig ef þú heldur þessu fram. En það er önnur saga. Eina leiðin til að minnka kókdrykkjuna hjá mér var einfaldlega að kaupa ekki kók. Ef það er til kók þá er allt of auðvelt að freystast í eina og eina dós sem verða ansi margar oft yfir daginn. Ég er samt ekkert hættur að drekka kók enda væri það vitleysa. Ég varð að finna mér einhvern annan drykk til að drekka með matnum og með mögulegu kvöldnasli. Ég hef valið Kristall Plús með Appelsínu- og Blóðappelsínubragði.
Átt þú við kókvandamál að stríða? Hver er aðaldrykkurinn þinn?
Var bent á frétt á visir.is af einum af heitustu lögfræðingum landsins. Frétt segir frá að það sé kominn trailer úr kvikmyndinni Bjarnfreðarson sem skartar hinum velkunna Georg úr Fangavaktinni, Dagvaktinni og Næturvaktinni. Þarna hefur einhver klár aðili gabbað visir.is eða þá að visir.is er að reyna að gabba þjóðina. Held því miður að visir.is sé með kúkinn í buxunum þarna. Þessa umræddu stiklu tengla þeir á síðunni og er hana að finna hér. Sannleikurinn er að þetta er ekki stikla fyrir bíómyndina heldur gamall netbrandari þar sem þú getur smellt mynd af þér og látið líta út fyrir að þú sér einhver þjóðhetja í Svíþjóð. Samanber hérna þá setti ég mynd af mér til að sýna hvernig þetta virkar. Screenshot af greininni hérna fyrir neðan.
Það leið ekki á löngu þangað til að visir.is áttaði sig á að þeir höfðu verið gabbaðir því að núna er Þessi grein því miður ekki lengur í birtingu. Hérna er hins vegar trailer frá Sagafilm.
Ég held að það muni ekki líða langt þangað til að við fáum svona fyrirsagnir á visir.is. Og þegar klikkað er á fréttina þá koma ekkert myndir af neinum að myrða annan með skrúfjárni heldur bara mögulega myndir af skrúfjárni í stúdíói eða verið að flytja mann í dómsal. Það er alltaf að færast í aukana að fyrirsagnirnar á visir.is séu hreinlega að ljúga að okkur. T.d. sá ég eina fyrirsögn sem stóð “Notar sérstakan klósettpappír – myndir”. Mér til mikillar gleði voru engar myndir af Mariuh Carrey að skeina sér en fréttin fjallaði um Mariuh Carey og kröfur hennar fyrir viðtal sem var tekið við hana á GMTV sjónvarpsstöðinni. Svo í lokin stendur “Svo má geta þess að Mariah hafði með sér eigin klósettpappír.” Rétt fyrirsögn gæti því verið “Miklar kröfur Mariuh Carey” og þá sleppa “-myndir” endingunni. Eða þá “Mariah Carey með sólgleraugu að kvöldi til fyrir framan svartan bíl – myndir”.
Önnur frétt sem ég rak augun í sem verður án efa tekin út áður en dagurinn er á enda ber fyrirsögnina “Hvaða hórutal er þetta? – myndir“. Myndirnar við fréttina tengjast svo sannarlega engum hórum eða ég ætla rétt að vona ekki því að þarna eru myndir af Ben Affleck, dóttur hans, Violet, og þremur blöðrum. Ef þið smellir á linkinn hérna fyrir ofan og lesið fréttina þá meikar hún líka lítið sens. Þar stendur í aðeins styttri orðum en fréttin er: “Myndirnar eru af Ben Affleck, Violet dóttur hans og þremur blöðrum. Ben Affleck segir að hann muni hringja í Matt Damon ef hann vaknar við hliðina á dauðri hóru. Ben hefur verið fjarri fjölskyldunni í Boston að leika í kvikmynd.”
Ef ég eignast einhvern tíman barn og visir.is mun birta svona myndagrein þar sem gefur til kynna að barnið mitt sé hóra þá hugsa ég að ég yrði ekki mjög sáttur. Hvað með þig?
Það er búið að vera nóg að gera hjá mér síðustu mánuðina að henda upp bókum fyrir Sögur útgáfu. Byrjaði á ljósmyndabók og svo túristabók. Þetta eru bækurnar The Selection og Top 10 Reykjavík and Iceland. The Selection eða Úrvalið er afbragðskemmtileg ljósmyndabók þar sem Einar Falur Ingófsson valdi 13 bestu ljósmyndara Íslandssögunnar frá upphafi. Fyrsta bókin af þessu tagi til að koma út hérna á fróninu held ég alveg örugglega. Top 10 Reykjavík er túristabók þar sem Dr. Gunni leiðir okkur í sannleikann um meira og minna allt sem er hægt að gera og ekki gera í Reykjavík og Ísland. Skemmtileg bók og ekki bara fyrir útlendinga. Svo kom smá pása hjá mér fyrir jólatörnina. Í þeirri törn setti ég upp bækurnar Síbería, eftir Fritz Má Jörgensson, Paradísarborgin, eftir Óttar M. Norðfjörð, Síðustu dagar móður minnar, eftir Sölva Björn Sigurðsson, Vormenn Íslands, eftir Mikael Torfason, Magnús Eiríksson Reyndu Aftur, eftir Tómas Hermannsson, Jónas Kristjánsson Frjáls og Óháður, eftir Jónas Kristjánsson, Svínið Pétur, eftir Guðmund Steingrímsson, Jón Ólafur með dauðann á hælunum, eftir kikku, og svo Bíósaga Bandaríkjanna, eftir Jónas Knútsson.
Flestar þessara bóka eru komnar í dreyfingu eða eru að detta í dreyfingu á allra næstu dögum. Er hrikalega spenntur að fá Bíósögu Bandaríkjana (mynd fyrir ofan) í hendurnar. Í þeirri bók er að finna um 360 síður og hver einasta síða er frábrugðin þeirri næstu. Þannig að á hverri einustu síðu er eitthvað sem kemur lesandanum á óvart. Ég gluggaði í textann þegar ég var að setja upp bókina og held að þetta eigi eftir að verða frábær lesning. Ef við miðum við Bókatíðindi 2009 sem duttu í lúgur í dag eða gær þá setti ég upp 1,4% af jólabókunum í ár.
Stuttu eftir áramót fór ég í ferð til Jinka sem er bær í Eþíópíu. Fylgdist þar sem störfum á spítalanum sem ber ábyrgð á svæði sem inniheldur hálfa milljón manns. Myndasaga frá mér birtist í Sunnudagsmogganum í dag þar sem tekin voru viðtöl við feðgana Sverri Ólafsson og Jóhannes Ólafsson. Þetta var merkileg lífsreynsla að fara þarna út og það er alveg frábært starf sem fer fram á þessum spítala. Þið getið séð fleiri myndir með því að fara inn á www.torfason.is.
Vaknaði klukkan 8:30 í gærmorgun á sunnudegi sem er auðvitað ekki sem á að gera. Þurfti að skafa í þokkabót. Myndaði hann Gunnar Nelson frá morgni til kvölds þar sem hann tók þátt í Íslandsmeistaramótinu í Brazilian Jiu-Jitsu. Þetta er annað árið sem mótið er haldið og var fjölgun keppenda ansi góð. Reyndar fækkaði aðeins í hópnum vegna veikinda… eða hræðslu við Gunnar Nelson. Það sáust ansi góðir taktar á þessu móti og fullt af fólki mætti til að horfa á. Eina sem vantaði fannst mér var veitingasala sem þeir hefðu stórgrætt á þar sem að eina sem hægt er að kaupa í Þróttaraheimilinu er kók í sjálfsala. Og eins og sannur Íslendingur þá átti ég ekki klink. Nóg af mér. Það var ekki við öðru að búast en að Gunnar myndi rúlla þessu upp sem hann og gerði. Hann vann flokkinn sinn (-81kg) sem og opna flokkinn örugglega. Fékk ekki stig á sig í öllum viðureignunum. Mun klára að ganga frá þessum myndadegi mögulega í vikunni og setja inn á torfason.is. Það er reyndar meira væntanlegt á torfason.is. Sagan mín frá Eþíópíu er nokkurn vegin klár þannig að hún kemur bráðlega líka.
Hérna er videosamantekt frá mótinu sem er líka að finna inn á bardagi.is.
